2022 жылдың 15 маусымында Кәркен Ахметов атындағы олимпиада резервінің республикалық мамандандырылған мектеп-интернат-колледжі қабырғасында мектеп бітіруші түлектеріне арналған «Сәт сапар, Жас түлек!» атты аттестат тапсыру салтанаты болды. Салтанатты жиынды осы мектеп директорының оқу ісі бойынша орынбасары Әділханова Ж.Б. ашты. 11 жылғы еңбектеріңіздің жемісі — мемлекеттік аттестат бүгін қолдарыңызда. Бұл құжат — өмірдің жаңа кезеңіне басты жолдама. Үлкен өмір есігі айқара ашылғанда, қуаныш пен шаттықтарыңыз мол болсын деген ниетін білдірді.
2021-2022 оқу жылында 11-сыныпты 87 шәкірт білім нәрімен сусындап алтын ұя мектебінен қанат қағып отыр. Олардың үшеуі атап айтқанда Сұлтанхан Данил, Манасов Ислам, Якимова Жаклин қызыл аттестатқа ие болды. Біздің оқушылар өз жетістіктерін спорт саласында ғана көрсетпей, білім бәйгесінде де көрсете алды. Мерекелік іс-шара барысында түлектеріміз осы мектептің ұжымына, ата-аналарына және өздерінің жаттықтырушыларына алғыстарын айтып, оларға дән риза екенін білдірді.
Мерекелік жиын оқушылардың концерттік бағдарламасы мен естелікке қаларлықтай суретке түсуімен аяқталды. Осылай кеше ғана тұлымдары желбіріп, жүректері лүпілдеп, мектеп қабырғасын имене аттаған ұл-қыздарымыздың ойы толып, бойы өсіп, алтын ұя мектебімен қоштасты. Бұл күн мектеп тарихында, мектеп бітіруші түлектеріміздің есінде мәңгі қалар деген үміттеміз.
